Pa le rachoch tijob’al ub’i’ Escuela rech Estudios Penitenciarios xkib’an jun nim riqonem nimaq’ij rumal xloq’ 20 chi k’ak’ taq b’insal ch’ich’ rech eqab’al kech ri winaq e tz’apilik pa japache’, are la’ uwach taq ya’ik uchuq’ab’ ri k’ak’ chajinem pa Taqawokajil Japache’ Tz’apib’al ub’i’ (SP) rech pa amaq’ tinamit.
Wa’ le k’ak’ puq b’insal ch’ich’ are la’ qas katob’anik rech kek’am b’i pa taq le ch’ich’ ri’ ri e’ajpache’, rech pa kub’al k’u’x sib’alaj e chajim pa tinamit xuquje’ pa aninaqil b’a’ kek’am b’i ri e’ajpache’ pa taq ri q’atb’al tzij, pa taq kuninb’al xuquje’ are rajawaxik pa uchak ri wokaj japache’. Wa’ ri ch’ich’ ri’ xeb’anik rech pa kub’al k’u’x kek’am b’i ri e’ajpache’, jacha’ taqom kab’anik ri’ rech pa kub’alil kekoj pa q’axeb’alil.
Pa le nimalaj ketaq wiri’
Eri ch’ich’ ri’ k’o ketaq pa rulewal uk’u’x nimatinamit, k’o ketaq b’i pa suroccidente xuquje’ pa rulewal releb’al kaqiq’ pa amaq’, are la’ rech kuya uchuq’ab’ ri b’anow puqtzukunem xuquje’ ub’anikil taq ri ilonik pa rachoch taq tz’apib’al e’ajpache’.
Le k’amal b’e Amaq’ Nimatinamit, Bernardo Arévalo, are xnab’ejik ub’anik le nimaq’ij ri’, pa sib’alaj xub’ij wiri’che ri jachb’al ri puq b’insal ch’ich’ pa wokajil tz’apib’al ja are la’ uwach ri jun nimalaj ya’ik uchuq’ab’ uchak kub’an ri SP, rech k’o uchokonsa’n kukoji pa taq le uchak kub’ano ruk’ pa nim utzilem xuquje’ rech pa unimaxik uchak utaqim ub’anik rumal le taqawokajil ri’.
Rumal ri’, le ministro rech Gobernación, Marco Antonio Villagrán, sib’alaj xub’ij che ri 20 chi b’insal ch’ich’ ri’ e’are la’ kataq kachajik ri’ rech kaya nim uchuq’ab’ri puqtzukunem chajinik kab’an chi paq’ij chi chaq’ab’ pa taq tz’apib’al japache’. Eri rajil kab’ixik, are kopan pa Q9,186,000.00 ri’.
Xuquje’, xuquje’ xub’ij che ri ub’anikil ri k’ak’ taqanik pa le tz’apib’al japache’ SP man are taj xaq tane’ ri utz ub’anik ri yakon nimaja, are rech b’a’ katik’ib’ax ub’anikil taq uchak ri wokajil ri’, rech ya’ik uchuq’ab’ ri chajinem pa Amaq’ xuquje’ rech pa utzilal kab’an ri puqtzukunem kumal taq ri ajchajinelab’ xuque’ ri chak pa taq rachoch tz’apib’al japache’. Pa le riqon ib’, xk’oj ri viceministro rech Seguridad, Roberto Solórzano ri’ are k’ut xub’an uk’utik uwach ri jupuq k’ak’ chi b’insal ch’ich’ chi ke ri e’ajpatanelab’.
Xuquje’ sib’alaj xub’ij che ri b’anow chajinem pa tinamit are ri’ kab’an k’a pa taq rachoch taq tz’apib’al e’ajpache’, pa ub’anikil taq ri chajib’al, ri k’ak’ taqoninem xuquje’ rech k’o nim uchuq’ab’ kab’an pa juntir.
Ri k’ak’ tajin ub’anik ri’
Rumal k’u ri’ eri k’amal b’e rech ri SP, Jorge López Dellachiessa, sib’alaj xub’ij che ri nim uchuq’ab’il ri jupuq b’insal ch’ich’ ri’ are uwach ub’anikil ri k’ak’ taqanem pa wokajilal ri’. Chi rij wari’ xub’ij che ri uya’ik we jupuq chi ch’ich’ ri’ are rech ri jun k’ak’ ub’anikil chak tajin ub’anik pa le wokajilal ri’ che pa naj taq junab’ xtzaq kanoq ri xb’an k’ax chi re ri’.
Pa le ub’anikil ri’, ruk’ wa’ eri Amaq’ sib’alaj kuya nim uchuq’ab’ ri chak patan pa le wokajil japache’ tz’apib’al pa le ya’ik ujastaq uchokonsa’n uchakub’al ri’ rech kub’an utz che ub’anikil ri chajinem pa amaq’ tinamit.