K’o b’elejeb’ nimaja rech Videoconferencias xkoj pa 22 rech febrero ri’, pa Rachoch Japache’ kech Achijab’ e tz’apilik pa qatinamit. Eri jun cholchak ri’, are utoq’im ukojik k’ak’ b’anonem pa rachoch japache’ xuquje’ pa q’atb’al tzij rech Iximulew, are la’ rech ya’ik uchuq’ab’ ri taqom chajim tinamit xuquje’ rech utz ri chak kab’an pa le wokaj q’atoj tzij pa tinamit.
Eri chakub’alil rech tecnología xkoj chi’, are la’ sib’alaj k’ak’ jastaq ri’, rech videoconferencias xkoj pa taq ri rachoch japache’ tz’apib’al winaqib’, are la’ k’o jun nim retalib’al utoq’axik ri q’atoj tzij xuquje’ rech utz ukojik kab’anik ri chakub’alil. Ruk’ wa’ are rech kek’am ta chi b’i ri winaq e tz’apilik pa taq ti q’atb’al tzij ri’ pa taq q’atoj tzij ketajin wiri’.
Eri Ministro rech Gobernación, Francisco Jiménez, sib’alaj xuya ub’ixij che ri nimaja rech videoconferencias toq’im ukojik are la’ rech kujikib’a uwach ri b’anoj chak pa saliqem pa taq ri q’atoj tzij rech k’ax ta kachomaxik pa q’atoj tzij ri winaqil e tz’apilik che ri rajwaxik keb’e ta chik pa taq ri q’atb’al tzij pa tinamit ri’.
Eri nimatat Jiménez xuquje’ sib’alaj xub’ij che ri k’ak’ uwach chakub’al tecnológico ri’ are la’ ri kemonchak tajin rumal ri Ministerio de Gobernación (Mingob), ri Organismo Judicial (OJ) xuquje’ ruk’ utob’anik ri Agencia Internacional rech Asuntos Antinarcóticos xuquje’ Kojob’al rech ri Taqanem (INL) rech ri Embajada rech Estados Unidos k’o pa Iximulew, ri k’o nim tob’anem xkib’ano pa le ukojik ri chakub’al ri’ rech kakoj pa taq ri nimaja rech videoconferencias ri’.
Eri K’amal b’e rech OJ xuquje’ rech ri Corte Suprema rech Justicia (CSJ), Oscar Cruz ri’, sib’alaj xub’ij che ruk’ ri ukojik ri nimaja ri’ are kakub’isax ub’anik pa jikomal utzilem ri q’atoj tzij xuk’umalil xuquje’ rech kechomaxik ri winaq e tz’apilik che ri jalajoj uwach ri kimak ri k’ax kib’anom, rech pa kub’al k’u’x kechakun ri e ajq’atol tzij xuquje’ rech ri q’atoj tzij kab’an neri’.
Jaw chi’ kakoj wiri’
Eri nimaja rech videoconferencias ri’ are la’ kakoj pa jalajoj taq rachoch japache’ tz’apib’al k’o pa rulewal qatinamit, chi la’ pa le Rachoch Japache’ Tz’apib’al kech Achijab’ xuquje’ pa Kitz’apib’al Ixoqib’, Santa Teresa, zona 18 rech uk’u’x nimatinamit, xuquje pa Kitz’apib’al Achijab’ xuquje’ Ixoqib’, k’o pa Chimaltenango ri’.
Xuquje’ pa le Rachoch Japache’ Kitz’apib’al Achijab’ rech El Boquerón, Cuilapa, Santa Rosa ri’, pa le Rachoch Japache’ Kitz’apib’al Achijab’, rech Reinstauración Constitucional, rech Fraijanes (Pavoncito) xuquje’ pa le Rachoch Japache’ Kitz’apib’al ub’i’ Granja Modelo rech Rehabilitación Cantel, k’o pa Xe’laju’.