Pa ronojel ri’ k’o 14 chi pisob’al ruk’ marihuana xriqitaj kumal reqa’lenelab’ ri Subdirección General rech Análisis rech Información Antinarcótica (SGAIA) rech ri Wokajil Ajchajil Tinamit (PNC), are chi’ xb’an jun tzukunem pa oxib’ q’ij rech enero ri’, pa le kilómetro 287.5 nimab’e Interamericana, pa juyub’al rech Colotenango, Chinab’jul.
Eri awan kunab’al xriqitajik pa oxib’ koxtar xuquje’ pa jun k’olib’al rech keqaxik pa jun tzukunem xb’an pa le kitak’alib’al ch’ich’ rech ereb’al winaq pa nimatinamit ri’. Are chi’ eri wokajil ajchajil tinamit pa komon q’ab’tob’anik kuk’ ri q’atol tzij rech ri Ministerio Público (MP) rech xkipiso ri awan kunab’al ri’. Eri ralal are kopan pa 42 pajb’alil, eri rajil kopan pa Q15 mil 750 chi pwaqil.
Rumal ri’ eri q’atb’al tzij xkiya ub’ixik che ri tzukunem chi rij wari’ are maj katanab’ax taj rech ketzukuxik keriqik xuquje’ kechapik ri e ajb’anol k’ax ri’, jeri’ rech qas kab’an le rilik ri k’olib’al che ri qas kak’ayix wi ri awan kunab’al. Are wa’ jun komon q’ab’tob’anik kumal ri ajchajil tinamit kuk’ ri winaqilal ri’ rech pa le uq’atexik taq ri narcotráfico pa ronojel rulewal qatinamit.