Katajin ri puqtzukunem ri’ rech ya’ik uchuq’ab’ ri chajinem pa taq rachoch tz’apib’al e’ajpache’ rech ri amaq’ tinamit. Rumal ri’ eri ajchajinelab’ rech ri Sistema Penitenciario (SP) pawe q’ij 26 rech abril, xkib’an jun puqtzukunem pa Rachoch Japache’ rech Q’antel, pa Xe’laju’, pa kemon kuk’ ri reqa’lenelab’ ri Wokajil Ajchajin Tinamit (PNC) xuquje’ kuk’ reqa’lenelab’ ri Wokajil Ajchajin Amaq’ Iximulew.
Rumal k’u ri’ xb’antaj kowonem xriqitaj loq 49 chi ch’aweb’alil, 18 ya’el uq’aq’nil ch’aweb’alil, kajib’ uq’aq’al ch’aweb’al, kajib’ ajxikin tob’al tzij, oxib’ ch’aweb’al q’axel tzij b’ixik ruk’ juntir uchakub’alil, ruk’ 11 chi kemilob’al, 102 ta’ik uqulib’al, oxib’ xut’ib’al kaqiq’, 15 chi kolob’ch’ich’ rech t’iqob’al k’amq’aq’nil, oxib’ tarjetas SD, kajib’ k’olib’al tzij USB, xuquje’ jun tarjeta SIM xriqitajik.
Xuquje’ xriqitajik 228 chi kaxon pimawuj rech sik’, wuqub’ ch’ich’lame’t rech tzam, 65 chi lame’t ruk’ tzam, jo’lajuj chi puch’b’alil, jo’k’al chi alaj taq k’olib’al ruk’ marihuana, wajxaqib’ chi ab’aj rech crack, kajib’ alaj k’olib’al ruk’ cocaína, 29 chi sik’, kajib’ tub’ub’al, kab’lajuj chi pisow, ruk’ nik’aj chik awan jastaq ri xk’am b’i pa taq q’atb’al tzij ri e k’o chi rij.
Ruk’ wa’ kutun rib’ ri puqtzukunem b’anom chi rij taq rachoch tz’apib’al e’ajpache’ rech rulewal amaq’ tinamit. Eri wokajil ajchajin tinamit ri e’ajchajin amaq’ ri’ e’are xkib’an usolixik kitzijolil ruk’ ri kijastaq ri winaqil rech ya’ik uchuq’ab’ ri chajinem kab’an pa taq kopanik ri winaqil che solinem ch’ab’enik pa taq tz’apib’al ja.
Chi uwach ri Rachoch e Tz’apib’al taq Winaq E’ajpache’ rech Jutiapa ri’ chi la’ k’ut xchap wi loq al Estefany N, 29 ujunab’, are kab’ixik xub’an toq’inik pwaq ri’. Rumal ri’ xtaq uchapik rumal ri Q’atb’al Tzij tinamit Sacatepéquez, pa julio rech 2025.
Ri al Estefany b’enaq che uch’ab’exik ri rachajil, al Jordi Garrido, ri tz’apital pa le japache’ rumal xub’an k’ax chi re ri ixoq. Eri PNC sib’alaj xub’ij che ri jun ixoq ri’ are kab’ixik aj uwinaqil ri molaj b’anol k’ax ri kejo’sanik are chi’ kakib’an ri k’ax pa rulewal tinamit rech Sacatepéquez. Eri tzukunem chi rij are katajin ub’anik na.