Eri chak xb’an kumal reqa’lenel ri Wokajil Ajchajil Tinamit (PNC) pa nimaq’ij Alaxib’al pa juntir taq tinamit rech we amaq’il, are xk’ul ri’ pa kub’al k’u’x nim joremal ki’kotemal ri’ kumal ri winaqilal e qawinaq kuk’ ri xepe naj pa uwachulew. Ruk’ xpaqabisax kajilab’al ri e ajchajil tinamit pa taq nim k’ayib’al, pa cajeros automáticos, pa ja k’olme’r ub’i’ agencias bancarias, pa taq uxlanib’al winaqil, pa taq uk’olib’al kiwa’kateb’al winaq, pa taq k’olib’al kitak’alib’al ri ch’ich’ rech ereb’al winaq xuquje’ pa taq nik’aj chik k’olib’alil che ri qas xkiriq wi kib’ ri winaqil, chi la’ k’ut qas xb’an wi kachajixik.
Eri Ministro rech Gobernación, Byron René Bor Illescas, sib’alaj xuya ub’ixik che pa 27 rech diciembre, qas xb’an ri ya’olchajinem winaqil kumal ri wokajil ajchajil tinamit, jeri’ xb’an uq’atexik ri b’anoj taq k’ax xuquje’ xkiq’atij uchuq’ab’ ri kamisanik, man junam ta ruk’ ri xk’ulmataj pa le 2022. “Are la’ rumal ri ya’olchajinem xb’an kumal ri wokajil ajchajil tinamit rech xkikub’isaj kachajixik ri winaqilal pa qatinamit pa taq we nimaq’ij ri’”, xcha’.
Xuquje’ eri taqawokajnel rech ri Ministerio rech Gobernación (Mingob) xub’ij che rumal ri’ xkib’an jun riqb’al ib’ kuk’ ri k’amal b’e rech chajin tinamit, rech retaxik rilik ri ya’olchajinem xb’an ri’ pa le k’ak’ ub’anikil chajinik rech kub’al k’u’x pa tinamit pa taq le nimaq’ij rech k’isb’al junab’ ri’.
Ri xb’antaj kowonem ruk’
Eri PNC xkiya loq utzijol ub’ixik, che pa taq ri ya’olchajinem tzukunik ri’ pa le 24 xuquje’ 25 rech diciembre ri’, xb’antaj kowonem xechapik e 236 chi winaqil rumal xkib’an ri k’ax. Xuquje’ xriqik 21 chi k’aqb’alil, xuquje’ xriq keb’ b’inisal ch’ich’ xuquje’ ruk’ kajib’ chi kejach’ich’ ri kab’ixik xa’ e eleq’am b’i. man je tawa’ rajilab’al ri k’ax ri’ xk’ulmataj pa le junab’ 2022, rumal ri’ kab’ixik chi k’o jun retalil ya’olchajinem tzukunik xb’antaj kumal ri e ajchajil tinamit.
Pa junab’ir kanoq e k’o 116 chi winaqib’ e ajb’anol k’ax xechap ri’, k’o 16 chi k’aqb’alil maj uwujilal xriqik, xuquje’ k’o wuqub’ chi ch’ich’ keb’inisaxik xeriqik, ri kab’ixik e eleq’am b’i. Eri chajinem xb’an ri’ are kuk’utu chi k’o jun nim ya’olchajinem tajin pa tinamit rumal ri Wokaj K’amal B’e rech Iximulew pa le reqele’n uchak ub’anom ri Taqawokajil rech ri Ya’olchajinem pa Amaq’ rech ri chajib’al xb’an pa taq le nimaq’ij rech k’isb’al junab’ ri’.