Pa rulewal amaq’ tinamit pa amaq’el katajin ri chajinem kumal ri reqa’lenelab’ ri Wokajil Ajchajin Tinamit (PNC), pa taq pwaqb’al ja k’olme’r, chi rij taq ri ch’ich’ kesax wi pwaq, pa taq nim rachoch k’ayib’alil, pa cooperativas, pa cajas rurales, pa taq k’ayib’al, pa taq uxlanb’al pa tinamit xuquje’ pa nik’aj chik k’olib’alil che ri qas kakiriqo wi kib’ ri winaqilal pa tojb’al ri Bono 14 ri’.
Eri kopanib’al ri ajchajin tinamit sib’alaj katajin pa taq k’olib’alil rech kaq’atexik b’anow taq k’ax, rech k’o pa joremal jikomal pa tinamit xuquje’ rech kakub’isax kachajixik ri winaqilal ri ke’opan che uk’amik ri uwi tojb’al wi’. Xuquje’ k’o chajinem kab’an chi rij kejach’ich’ jeri’ che kaqan ri ajchajin tinamit pa taq ri k’olib’alil ri’.
Eri b’anowem ri’ k’o uk’olib’al ri chajinem xuquje’ wa’katisam uwach pa taq nimab’e uquje’ pa taq k’olib’alil, chi la’ k’ut eri wokajil ajchajin tinamit kakil wi kitzijol ri winaqilal rech kakilo wexa’ e k’o taqom kichapik, rech kakilo we keqam kiwujil ri’, rech kilik we k’o kitijom tzam kib’insam kich’ich’, rech ke’ilik we kakinimaj ri retalil ri k’utb’e ri’.
Xuquje’, rech kakisolij taq ri ch’ich’, ri kejach’ich’, ri tuc tuc, ri taxis, ri ch’ich’ rech ereb’al winaq xuquje’ ri ch’ich’ rech eqa’n taq jastaq rech kilik we man k’ot e eleq’am b’i we e kojom taj kumal molaj b’anol k’ax ri keqam b’i jastaq ri kub’an k’ax chi re ri kik’aslemal ri winaqil ri’.
Xuquje’ xkib’an k’ilaj taq no’jinem rech kaq’atexik che ri winaqil ri’ keqam ta pa jun b’anow k’ax tane’, rech kareqaj taj chomapwaq, rech kukoj taj ubanca virtual rech keq’axe’j pwaq ri’, rech kub’an kuwenta we karesaj pwaq pa pwaqb’al ja k’olme’r, wexa’ k’o ku’uk’ulmaj tane’ kub’ij b’a’ pa le 110 rech ri PNC, wexa’ k’o kuk’ulmaj wene’ k’o jun k’ax kurilo rech wene’ k’o pa aninaqil ri’.
Eri a Héctor Prera, jun k’amal b’e rech ri PNC, sib’alaj xub’ij che ri upatanexik ri cholchajinem ri’ rumal katoj ri Bono 14, rumal ri’ xumaj ub’anik ri chajinem pa Iximulew xuquje’ pa taq tainamit rech rulewal amaq’il ri’. “Qeta’m k’ut che ri winaqil kakub’ kik’u’x chi ke ri ajchajin tinamit, rumal ri’, kintoq’ij ub’ixik chi ke konojel ri ajchak ri e k’o pa wokajilal ri’ chakiya’o b’a’ jun utzilaj chak patan”, xcha’.
K’a le umajik upatanexik ri cholchajinem ri’ ub’i’ “Bono 14 Seguro”, pa le nab’e q’ij rech julio kanoq, xtanab’ax ri uxlanem chi ke ri ajchajin tinamit, are rech b’a’ konojel kek’oji pa chajinem pa wokajil chajin tinamit rech kakib’an uq’atexik k’ax, rech kek’oji ri’ xuquje’ rech b’anow puqtzukunem rech kakikub’isaj ub’anik ri k’olem pa jikomal chi ke ri winaqilal.