Ri uq’atb’al tzij ri Amaq’ xuya’ ub’e che ri k’amawem uq’ab’al tzij chi kixo’l ri e k’o pa le ch’oj xekiriq utzilaj taq chomab’al recxh kek’oji pa joremal ri tinamit winaqil chi rij ri ch’ojinik riulew r k’o k’i junab’ chik k’olob’ik pa tq ri tinamit Ixchiguán xuquje’ Tajumulco, pa le juyub’ tinamit rech San Marcos.
Pa le uq’ab’ taq chak ri’, xb’an jun riqon ib’ chi kixo’l ri ajchakib’ rech ri q’atb’al tzij, ri taqanelab’, ri ajkalte’ib’ xuquje’ ri k’amal taq b’e kech ri keb’ tinamit e k’o pa we k’axk’olil ri’. Xk’am ub’e ub’anik rumal ri nim taqawokajnel rech ri Gobernación, nimatat a Marco Antonio Villeda, rachi’l ri ukab’ taqawokajnel rech ri Ucholajil Tob’anik Chajiem xuquje’ Ucholchakunem ri Taqawokajnem rech ri Ajch’ojab’ K’amal B’e Amaq’ Tinamit (MDN), a Jorge Lemus, xuquje’ rajb’anol taqanib’al rech ri B’anb’al Taqanawuj rech ri Amaq’, a Mario Velásquez.
Ri k’amal b’e rech ri Taqawokajnem rech Gobernación, ri xutatab’ej ri kichomanik ri keb’ uq’ab’il ri e k’o pa we k’axk’olil ri’, xuya ub’ixik che nim ub’anik ri chomanik amaq’el rech kariqitaj jun utzilaj solib’al uchomatajik ri ch’a’oj rumal ukolik ri ulew ri’. Xuquje’ xujikib’a ri ujachom rib’ ri Saq Amaq’ rech kape chi uwach ri taqchi’b’al ri kato’w che usolik ri ch’a’oj ri’.
Xub’ij chik che nim ub’anik uq’atexik wajun k’axk’olil ri’, rumal che e k’o jujun molaj ajb’anol etzelal k’amom kik’u’x che wajun k’ax ri’ rech kekik’is kib’anik ri itzel taq chak ri man taqal taj, xuquje’ kekiq’oyob’a pa uwi’ ri oyowal ri xk’iy chi kixo’l ri keb’ tinamit ri’.
“Wa’ we jun q’eb’al ib’ ri xk’utuwik ri b’e rech k’isik wa’ we ch’o’oj k’axk’olil, ri man ruk’ ta chuq’ab’ k’isik, xane’ ruk’ ch’ab’enik tzijonem”, xcha’ le Ministro Villeda.
Pa we jun cholaj tzijonem ri’ xrilik xuquje’ xnik’ox ri k’olb’alil pa ri k’o wi ri ch’o’j; ri b’anikil rech kaya’ jun uq’ab’il xuquje’ uk’ulb’a’t chi kixo’l ri keb’ tinamit; xuquje’ ri tob’anik rech ukojik taq cholchak on k’ak’ taq b’e rech utzirisanik, chi kixo’l nik’aj chik chak ri kub’an chi kak’is chi jumul ri ch’o’j ri b’anom pa we jun peraj ulewal ri’.
Xoponik chuq’ab’ ri q’atb’al tzij rech ri tinamit San Marcos, are ri tat a Henry De León; ri ukab’ k’amal b’e rech ri Taqawokaj Ajchajil Tinamit (PNC), tat a Héctor Prera ri’; nik’aj chik k’amal taq b’e rech ri chajinelab’, ri taqo’ninelab’ rech ri K’amal B’e Amaq’ chi rij ri Suk’umaxik Ch’o’j (COPRECON), xuquje’ ri kajtaqo’n ri keb’ uq’ab’ tinamit ri’.

