Eri tzukunelab’ rech ri Wokajil Ajchajin Tinamit (PNC) xkib’an 164 chi puqtzukunem rech kaq’atexik taq ri molaj b’anol k’ax kakitoq’ij pwaq pa taq uq’ab’ tinamit rech Villa Nueva, Mixco, rech San Miguel Petapa, rech Fraijanes, rech Santa Catarina xuquje’ rech uk’u’x nimatinamit Iximulew, jeri’ pa Sacatepéquez, paChimaltenango, pa Baja Verapaz, pa Retalhuleu xuquje’ pa Escuintla ri’.
Eri wokajil ajchajin tinamit xkib’an jun nim puqtzukunem pa taq achochib’al, rech xkitaqij umolik ri jastaq rech q’alajisab’al rech kuya uchuq’ab’ ri b’anoj tzukunem katajin ri’ xuquje’ rech kechap loq ri nik’aj b’anol k’ax ri’.
Eri puqtzunem ri’ are xb’antaj pa kemonchak kuk’ ri q’atol tzij rech ri MP. Rumal ri’ eri q’atb’al tzij xkiya ub’ixik chi ke ri winaqilal rech chakib’ij pa 110 kuk’ ri PNC xuquje’ pa 1561 rech Crime Stopper wexa’ k’o ri k’ax kakilo kab’anik, rech kakib’ij pa aninaqil. Eri b’iw ub’ixik loq pa awalik kak’am apan utzijol kumal ri e’ajchajin tinamit ri’.