Eri Wokaj Ajchajil K’ache’laj (Diprona) ri’ rech ri Wokajil Ajchajil Tinamit (PNC), xkichap e kajib’ chi winaqil rumal keqam b’i qupim che’ man k’ot uwujilal ri’ pa jalajoj rulewal tinamit rech pa we Amaq’.
Eri nab’e ri’ are xriqitaj pa le krusb’e kab’e pa le aldea Nueva Libertad, Sayaxché, Petén ri’, chi la’ k’ut xchapataj wi loq a Rubelio Flores Gutiérrez 54 ujunab’ ri’, kab’ixik are chi’ k’amom b’i pa jun ch’ich’ rech eqa’nib’al are chi’ reqam b’i kab’lajuj chi etok’al chi qupim che’ ri q’atam raqan ri’ rech ri che’ Tinto, rumal maj uwujilal keqam tane’ ri’ che ri kesax loq pa le Instituto Nacional rech Bosques (INAB) ri’.
Pa le ukab’ q’atenik, eri reqa’lenel ri delegación rech Diprona xkichap loq jun achi ub’i’ Marlo Yotanan Cardona González 25 ujunab’ xuquje’ a Gerson David Pérez Melgar 35 ujunab’, e are kab’ixik keqam b’i pa jun ch’ich’ rech eqa’n kajib’ chi etok’al chi qupim che’ rech mangle Colorado, che ri tajin usachik uwach. Are wa’ xriqitaj pa Ayutla, San Marcos ri’.
Pa k’isb’al ri’, eri reqa’lenel e ajchajil tinamit xkichap loq jun achi ub’i’ Ismael Alejandro Muñoz Monzón 37 ujunab’, are chi’ keqam b’i pa jun pickup kajib’ chi etok’al chi qupim che’ ri kab’alisam ri’, ri maj uwujil keqam tane’ ri’.
Eri xriqitajik are pa jun k’ache’laj rech ri finca ub’i’ le Violón sector Las Huertas, Canalitos pa le zona 24 rech pa nimatinamit.
Konojel ri’ xek’am b’i pa q’atb’al tzij ri’.