Rumal pa aninaqil xe’opan che ilonem ri reqa’enelab’ ri Comisaría 15 xuquje’ ruk’ reqa’lenelab’ ri División Especializada rech Investigación Criminal (DEIC), rech ri Wokajil Ajchajil Tinamit (PNC), iwir xekowon che kichapik e oxib’ chi b’anol k’ax e uwinaqil ri pandill rech Barrio 18, e are k’ut xkib’an jun k’aqanik che ri xekam wi e oxib’ chi achijab’ pa Villa Canales, Iximulew ri’.
Eri nik’aj winaq xechapataj ri’ e are a Erick Lara Sicay, 29 ujunab’; a Joel Monterroso Acevedo, 28 ujunab’, xuquje’ Alan Fuentes Hernández, 21 ujunab’. Pa le puqtzukunik chapem ri’ xriqitaj wi uloq jun raqarik k’aqb’alil, keb’ k’aqb’alil, kajib’ k’olib’al ub’aq’ k’aqb’al xuquje’ 37 ub’aq’ k’aqb’alil ri jalajoj uwach kakojik, jeri’ xriqitaj nik’aj chalecos junam ruk’ ri kakikoj ri wokaj chajin tinamit.
Eri nik’aj winaq ri’, xkaj xekanimajik pa jun ch’ich’ ruk’ ri placas b’inisal rech P 693BLZ are chi’ xb’antaj ri k’aqanem, pa le 24 rech marzo rech pa junab’ ri’, ri xechapataj wi uloq nik’aj b’anol k’ax ri’ kumal ri wokajil ajchajin tinamit.
Eri q’atb’al tzij xkib’ij che ri e oxib’ chi winaqil ri’ xechapik xek’am b’i pa q’atb’al tzij chi rij ri k’ax xkib’ano. Rumal ri’ eri tzukunem chi kij are la’ katajin na, rech kaq’alajisax ub’antajil ri k’ax ri’.