Eri alab’om alitom rech ri 76 uq’ab’ tinamit rech ri amaq’ tinamit xetatb’enik pa le Programa Nacional rech Servicio Cívico rech Educación Vial 2026, jun cholchak kapatanexik pa le k’isb’al kab’lajuj junab’ che ri b’anom ukojik rech ketijoxik ketatb’enik ri k’ialj winaqilal e’aj iximulew ri’. Pa le ub’anob’alil ri’, e k’o 552 e’ajpatanelab’ amaq’ tinamit, ri k’o 18 pa 24 kijunab’, ri ketob’anik rech ya’ik uchuq’ab’ b’anow no’jilib’anem pa taq katinamit ri winaqilal. Eri jaqib’al ri cholchak ri’ are xb’an pa le Parq2ue Erick Barrondo, pa le zona 7 rech ri uk’u’x nimatinamit Iximulew.
Taqom ub’anik wari’ rumal le Ministerio rech Gobernación, pa le upatanik ri Departamento rech Tránsito rech ri Wokajil Ajchajin Tinamit (PNC), eri cholb’al chak ri’ are kab’anik pa le 22 rech julio pa le 30 rech octubre ri’. Pa job’ ik’ k’ut, eri e’ajpataninel ri’ e’are kakijipij ub’anik pa uq’ab’ taq tinamit, ri eta’mab’alil rech educación vial, rech uq’atexik riqon k’ax kumal taq ri ch’ich’ pa nimab’e, rech kanimaxik ri retal taq k’utb’e xuquje’ kakinimaj b’a’ ub’anik uq’ij pa taq nimab’e.
Are uwach ri b’anow chakunem pa tinamit, eri rajpatanel amaq’ ri’ kakimaj ub’anik ri cholchak ri’ rech tob’anem pa katinamit winaqilal rech pa nojimal kakik’am uch’ob’ik ub’anik ri kino’jchakunik. Ch’ob’om chik, che pa le upatanexik ri cholchak ri’, e k’o 700 mil chi winaqilal, e k’o e’ajtijoxel ri’, e k’o e’ajtijonelab’ xuquje’ e k’o e’ajb’insal ch’ich’ ri’, ri kakitijoj kib’ chi rij uq’atexik ri b’anow k’ax pa taq nimab’e.
Eri jaqik uwach are xb’antaj rumal ri ministro rech Gobernación, Marco Antonio Villeda, ri sib’alaj xub’ij che ri cholchak ri’ are oxib’ uwach ub’anik pa amaq’ tinamit: ri alab’om alitom, ri nimanchak xuquje’ ri kato’ik kiwach ri winaqilal. Xuquje’ xub’ij che ri ya’olchajinem pa nimab’e man xaq ta ri’ keqale’n ri q’atb’al tzij, xane’ are ri’ jun kich’ob’onik xuquje’ ri kichakunik ri jujun taq winaqilal ri kakib’an ronojel q’iji, are la’ jun ilob’anem chi kuwach ri wokajilal kuk’ ri winaqilal.
Eri ministro xuquje’ xutoq’ij ub’ixik chi ke ri q’atb’al tzij e’ajpatanel rech ri cholchak rech kikachi’laj ri alab’om alitom pa le b’anik katjixik, rech kakich’ob’ b’a’ ub’anik ri rajawaxik chi ke xuquje’ rech kakikoj ri chakub’al rajawaxik pa le ub’anik taq ri kichak. Xuquje’, xub’ij chi ke ri winaqilal rech chakitotab’ej, rech ketob’anik xuquje’ rech kakiloq’aj ri kichak ri servidores cívicos pa b’anik utzilem rech ri uq’atexik ri k’ax xuquje’ ri chajinem pa nimab’e.
Pa le ulanem tzij xetatb’enik ri secretaria ejecutiva rech ri Servicio Cívico, Stefani Tello; ri k’amal b’e rech ri Wokajil Ajchajil Tinamit, Héctor González Prera; ri taqanel rech ri Departamento rech Tránsito rech ri Wokajil Ajchajin Tinamit, Carlos Fuentes; xuquje’ ri ukab’ taqanel rech ri jachakub’al ri’, Osman Esquivel.
Ruk’ ri cholchak ri’, eri Ministerio rech Gobernación sib’alaj xub’iji che ri nimachak ri’ are kab’anik rech ya’el uchuq’ab’ ri ketatb’enik ri alab’om alitom pa le b’anik uchuq’ab’ ri chak pa tinamit ri kik’amom ub’eyal, ri nimachak kuk’ ri winaqilal xuquje’ ri reta’maxik ri b’anik chak chi jujunal xuquje’ ruk’ kino’jchakunik, pa b’anik utzilem chi ke ri winaqilal xuqje’ ri tinamit aj iximulew ri’.