Sib’alaj taqim katzukuxik ri ch’ich’ che ri e eleq’am b’i xuquje’ rech kaq’atexik ri jastaq kak’oj pa b’anoj k’ax ri’, rumal ri’ eri reqa’lenel ri División rech Investigación Criminal (DEIC) rech ri Wokajil Ajchajil Tinamit (PNC) pa tob’anik che ri Ministerio Público ri’ (MP), xek’oji pa jun b’anoj tzukunem xkib’an paq’ij kamik, pa le 8 avenida 7 calle, Colonia Santa Otilia rech zona 4 ech Chimaltenango ri’. Chi la’ k’ut xkiriq wi jun nim kaxonach’ich’ kab’ixik eleq’am b’i.
Pa le tzukunem ri’ eri kaxonach’ich’ ruk’ le placa rech kab’inisaxik TC07BNF, xilotajik eri ch’ich’ ri’ man k’ot ri plaqueta rech serie VIN reqam tane’.
Rumal ri’ eri winaq are chi’ xuta chi re chi rij ri ch’ich’ ri’, xub’ij che ri jun ch’ich’ ri’ are xuloq’ pa Q. 40,000.00 ri’. Rech xuk’utu che Tzij xuloq’o are xuk’ut chi uwujil rech utojom pa uq’ab’ ri jun Auxiliar Fiscal ri rachib’al taq ri uwujilal rech ri pwaq xutoj chi rij xuquje’ xuya ub’ixik ucholaj jas le uloq’ik xub’an wa’ le nim kaxonach’ich’ ri’.
Chi la’ k’ut xopan wi ri ajchoq’e le kaxonach’ich’ rech xub’ij eri placas rech kab’inisaxik are ri TC-61BLT ri’. Eri jun ch’ich’ ri’ kab’ixik are xeleq’axik pa le 22 rech diciembre rech 2022.
Rumal ri’ xaq xu’ wiri’ xchap b’i le jun nim kaxonach’ich’ rech kachomaj ri’.