Pa aninaqil eri reqa’lenelab’ ri comisaría 31 rech ri Wokajil Ajchajil Tinamit (PNC), paq’ij martes 8 rech noviembre ri’ xekowon xkichapo e oxib’ chi elaq’omab’ ri xkeleq’aj b’i ri nim kaxonach’ich’ ruk’ 500 quintales rech asukar ri’ pa le kilómetro 44 jurisdicción rech Palín, Escuintla ri’.
Eri nik’aj xechapatajik e are ri’: a Francisco Javier Fuentes Juárez, 26 ujunab’, alias Chico, a Wagner Raúl Lima Morales, 36 ujunab’, alias El Colocho ri’ xuquje’ a Gerson Estuardo Velásquez Sandoval, 38 ujunab’, pa aninaqil k’ut e are xechapataj pa le 5ª avenida rech ri colonia Casa Blanca rech pa tinamit ri’. Xriqitaj kuk’ jun k’aqb’alil rech 9 milímetros, jun tolw xuquje’ waqib’ ub’aq’ k’aqb’alil rech utz kakojik.
Chi la’ k’ut xriqitaj wi le ujalom ri kaxonach’ich’ ruk’ ri placas comerciales C-787PQT are kuchararej ri furgón TC-95CLJ ri’. Xuquje’ xq’atexik xkichap b’i jun ch’ich’ ruk’ ri placas rech kab’inisaxik P-998JSP are ri’ xkikoj nik’aj elaq’omab’ are chi’ xekanimajik.
Eri q’atenik kumal e ajchajil tinamit ri’ are la’ xb’antajik rech xterenb’ex ri ub’ixik xub’an loq ri winaq pa le 110 kuk’ e ajchajil tinamit rumal xb’an xuriq jun k’ax ri’. Pa aninaqil k’ut eri e ajchajil tinamit xkiriq k’ut ri nimach’ich’ ri’ che ri xeleq’ax b’i kumal nik’aj e ajb’anol k’ax.