Pa taq ri tzukunem xb’an kumal ri reqa’lenelab’ ri Wokaj Ajchajinelab’ e Ajq’atenel ri Pandillas ri’ (Dipanda) rech ri Wokajil Ajchajil Tinamit (PNC), pawe q’ij kamik xkichap loq e 74 chi ab’om xuquje’ alitom, ri xek’am b’i pa le Q’atb’al Tzij ri Ke’uchomaj rumal e ajb’anol k’ax ch’ojinem ri’.
Eri Taqanel rech ri Dipanda, a Ángel Cambara, xub’ij eri nik’aj ab’om alitom ri’ k’o uch’ojil q’atb’al tzij chi kij rumal e uwinaqil ri jun Mara Salvatrucha (MS) ri’, xuquje’ e k’o uwinaqil ri jun pandilla rech ri Barrio 18 xuquje’ kuk’ nik’aj kakib’an kech jacha kakib’an ri qas e b’anol k’ax chi ke ri winaqilal rech kakitoq’ij rech kakitoj pwaq pa uq’ab’ ri’.
“Xuquje’ tajin kojupan che kasolixik ri ab’om alitom keriqitaj pa taq ri tijob’al ri’ rech b’a’ kakiq’el kib’ ke’ok ta kkuk’ ri molaj taq b’anol k’ax, rumal k’ut eri nik’aj winaq ri’ man e utz taj, xa’ kakib’an ri k’ax chi ke ri winaqilal pa tinamit xuquje’ naj ta ri kik’aslemalil ri ab’om alitom ri’ rumal k’o chi ke kakiriq kamikalil”, xcha’ ri a Cambara.
E k’o ri xechapik
Paq’ij rech 12 rech octubre ri’, eri reqa’lenel ri Dipanda xkichap jun nim alit 16 ujunab’, xkik’am b’i pa Q’atb’al Tzij rech ke’uchomaj ri Ke’umoxirik, are chi’ xchapik are chi’ xopan che usik’ik jun pisob’al ruk’ Q3 mil, are pwaq xutoq’ij chech jun winaq pa le zona 10 rech uk’u’x nimatinamit.