Eri k’olib’al Eta’manik rech ri Nimatijob’al rech ri Wokajil Ajchajil Tinamit (PNC) xejach wi loq kimik ri waqlajuj chi ch’ich’ rech chajinem xsipax loq rumal Estados Unidos ri’, che ri ar katob’an che ya’ik uchuq’ab’ ri puqchajinem rumal ri Subdirección General rech Análisis rech Información Antinarcótica (SGAIA), pa le uq’atxik taq ri narcotráfico ri’ ruk’ nik’aj chik b’anoj k’ax kab’an pa taq k’ulb’a’til rech Iximulew.
Eri k’amal b’e Iximulew, Bernardo Arévalo, sib’alaj xub’ij che ri amaq’il tinamit ri’ man utz taj we katuke’lej rib’, xane’ rajwaxik are jun pa k’amq’ab’ tzij chi kuxo’l taq ri nimatinamit. Xuqjuje’, xumaltyoxij utob’anik ri winaqilal tinamit xuquje’ che ri K’amal B’e rech Estados Unidos, pa unimaxik ri eqele’n chakunem ri’ pa le kaq’atexik taq ri k’ax kab’an pa wokajil amaq’ib’ nimatinamit.
Xuquje’ eri k’amal b’e amaq’il sib’alaj xuya utzijol ub’ixik ri’ eri sipanem ri’ are la’ xya’taj loq rumal ri K’amal b’e estadounidense pa jun retal k’utub’al yab’al tob’anem ruk’ qatinamit, emu wari’ rech kakoj pa le rulewalil tinamit. Xuquje’ xub’ij che ri chakub’alil are ‘a rajwaxik utz ukojik kab’anik xuquje’ pa le kaq’atexik taq ri e ajb’anol taq k’ax.
Rumal ri’ eri Ministro rech Gobernación, Francisco Jiménez, xub’ij k’o nim upatanib’al ri xjach loq ri 19 chi ch’ich’ rech chajinem xya loq, are la’ kakikojo ri e jok’al chi reqa’lenel e ajchajin tinamit, xuquje’ katob’anik pa le ya’ik uchuq’ab’ ri puqchajinem tzukunik pa taq k’ulb’a’til juyub’ pa tinamit, rech b’a qas kaqatexik taq ri narcotráfico, ri ch’ijom k’ax chi kech winaqib’, ruk’ ri elaq’nik pa taqawokajl xuquje’ ri k’ayin awan jataq, ruk’ nik’aj chik b’anoj k’ax.
Eri Embajador rech Estados Unidos, Tobin John Bradley, sib’alaj xutzuj eri upatan reqele’n ri utinamit rech pa kemon kachakun ruk’ ri K’amal B’e Amaq’ Arévalo pa le uq’atexik taq ri narcotráfico xuquje’ nik’aj chik molaj b’anol k’ax pa rulewalil taq tinamit. Jeri’ xub’ij che ri xusipaj loq eri rajil are US$ 600 mil (junam ruk’ Q4.8 millones ri’), ruk’ wa’ kuk’utu chi k’o jun nim eqele’n tzij k’amq’ab’ chi kuwach ri keb’ nimatinamit ri’ pa le uq’atexik taq ri b’anoj k’ax pa rulewalil tinamit.
Pa le jachinem ri’ xb’an jun k’utub’al q’atenik awan kunab’alil kumal ri wokajil ajchajil tinamit e aj iximulew, pa le xb’an wi uk’utik ruk’ ri ch’ich’ rech chajinem tzukunik ri’ are rajwaxik pa le kaq’atexik taq ri molaj b’anol k’ax. Xuquje’, eri Unidad Aérea rech ri Ministerio rech Gobernación (Unagob) xub’an jun k’utub’al kirapanik pa kaqiq’ cho kaj, rech xb’an uk’utik chi k’o nim upatanib’al ri tob’anem chi kuwach ri keb’ nimatinamit ri’ pa le uq’atexik taq ri molaj b’anol k’ax pa rulewalil tinamit.