Pa le b’anoj nimatzijolinem, eri q’atb’al tzij rech ri Wokajil Ajchajil Tinamit (PNC) xuquje’ rumal ri Ministerio Público (MP), xkiya utzijol che e k’o 500 chi reqa’lenelab’ chajin tinamit xek’oji pa le tzukunem rech uq’atexik taq ri toq’inik pwaq ruk’ ri b’anoj taq elaq’ kumal ri b’anol k’ax ri’.
Eri Héctor Hernández K’amal b’e rech ri PNC, xub’ij che xb’antaj paq’ij 21 rech noviembre, k’i taq b’anoj tzukunem pa taq ja k’olib’al, ri xriqitaj wi loq k’i taq jastaq kuq’alajisaj uwach ri k’ax b’anom pa le Tierra Nueva, Chinautla, Lo de Fuentes, Mixco; San Juan Sacatepéquez; Santa Catarina Pinula xuquje’ pa zona 18 rech pa nimatinamit Iximulew.
Eri b’anoj tzukunem are la’ xb’an kumal reqa’lenelab’ ri Departamento rech Investigación rech Delitos Financieros xuquje’ Económicos rech ri División Especializada rech Investigación Criminal (DEIC) xuquje’ rech ri División Nacional Ajchajinelab’ rech Q’atenik ri Pandillas(Dipanda), “rumal ri’ xechapataj loq a Marvin Javier Oliva López, al Londi Yaneth Estrada Figueroa, a Arturo Ajmac Uluan xuquje’ al Angeline Roxana Vásquez Santiago, e are kab’ixik e ajtoq’inel pwaq chi ke winaq. Eri nik’aj b’anol k’ax ri’ e uwinaqil ri jun molaj b’anoj k’ax kib’i’ clica Latin Crazy rech ri pandilla rech ri Barrio 18, al Iris Violeta Hernández Cruz, 28 ujunab’ xuquje’ al Joselin Michael Véliz Ávalos xuquje’ a William Ezequiel Portillo”, xcha’ ri a Hernández ri’.
Eri q’atb’al tzij xkib’ij, eri nik’aj winaqil ri’ e are kab’ixik xkib’an k’ax utoq’ixik tojb’al pwaq chi ke e ajb’anol k’ax xuquje’ chi ke e ajb’inisal ch’ich’ pa tinamit, che ri kakik’am b’i winaq pa taq uq’ab’ tinamit rech rulewal Iximulew.
Ri q’atenik b’anoj elaq’
Eri reqa’lenelab’ ri DEIC xuquje’ kuk’ rajq’atol tzij ri Fiscalía rech Q’ateb’al Corrupción rech ri MP, xkiya utzijol che e k’o k’i winaq xechap pa jun ja k’olib’al k’o pa uk’u’x nimatinamit, pa Villa Nueva, pa Mixco, pa San Juan xuquje’ pa San Lucas Sacatepéquez.
E are wa ri xechapik
• a Alberto García Estrada (48 ujunab’)
• al Amanda Alicia Ruiz Santos de Aguirre (54 ujunab’)
• a Edgar Aníbal Gómez Escobar (47 ujunab’)
• al Vilma Patricia Duque Estrada (51 ujunab’)
• al Nancy Carina García Hernández (46 ujunab’)
• al Gloria Esthela Aragón Jerónimo de Mérida (35 ujunab’)
• a Oscar David Sunun Mutzus (43 ujunab’)
• a Erick Roberto Donis Sandoval (55 ujunab’)
• a Brayan Estrehicy Jiménez Ramírez (31 ujunab’)
• a Diego Israel Ramos Pérez (34 ujunab’)
• al Marcia Lorena Barrios Salazar (41 ujunab’).
Eri winaq xechapataj ri’ kek’am b’i pa q’atb’al tzij rumal ri b’anoj k’ax xkib’ano, ri b’anoj taq elaq’, ri releq’axik taq jastaq, pwaq xuquje’ rumal ri’ k’o ri q’atb’al tzij chi kij.
Rumal k’ut xb’antaj kowonem xechapatajik are la’ rech katerne’xik rij ri Q3 millones che ri eleq’am, ri xaq kab’ixik are la’ xkoj che uloq’axik ri peraj taq juyub’ ri man tzij taj, are la’ kakoj che ub’anim nim che uwach ri nimab’e rech Sanarate-El Rancho, El Progreso. Ri’.