Eri División Especializada rech Investigación Criminal (DEIC) rech ri Wokajil Ajchajil Tinamit (PNC), pa komonchak ruk’ ri Q’atb’al Tzij rech Q’atenel Toq’inik Pwaq rech ri Ministerio Público (MP) paq’ij kamik xkib’an k’i taq tzukunem pa Fraijanes, pa Villa Canales xuquje’ pa San Miguel Petapa, pa nimatinamit Guatemala xuquje’ pa Puerto Barrios, Izabal; chi la’ k’ut xkichap wi loq waqib’ chi e ajtoq’inel pwaq e uwinaqil ri jun puq b’anol k’ax kib’i’ Los Gatos, kakikamisaj winaq xuquje’ kakitoq’ij pwaq chi ke e ajchoq’e ch’ich’.
Eri winaq xechapatajik e are: a Ervin Rolando Urías Gravez, 30 ujunab’, alias El Gato, ajtaqonel ri puq b’anol k’ax ri’; a Federico López Morales, 42 ujunab’, alias La Pulga; a Elmer Daniel Monterroso Zelada, 40 ujunab’; al Roxana Maribel González Ortiz, 40 ujunab’; a Fernando Carranza Bran, 49 ujunab’; alias El Viejo xuquje’ al Mónica Fabiola Paz Mayen, 21 ujunab’. Are are kab’ixik k’o winaq xkitaqij kikamisaxik, xaq katajinik xkitoq’ij pwaq chi ke e ajchoq’e ch’ich’ xuquje’ xkib’an nik’aj chik b’anoj k’ax.
Pa taq le kachoch xtzukux ri’ xriq wi loq lajuj chi ch’aweb’al rech eqam, keb’ k’aqb’alil, keb’ k’olib’al rech chiyim ruk’ awan kunab’al marihuana, k’o ub’aq’ k’aqb’alil, tarjetas SIM ruk’ nik’ax chik jastaq k’o q’atb’al Tzij chi rij, are la’ kak’is utzukuxik uwach ri’.
Eri tzukunib’al xb’an chi kij, xuq’alajisaj che ri nik’aj b’anol k’ax ri’ ruk’ xib’inem b’iw kamisanik xkitoq’ij pwaq ri’ xaq pa taq wuqq’ij ri’ chi ke e 60 chi e ajchoq’e ch’ich’ rech kechakun pa uq’ab’ tinamit rech nimatinamit Paxil.
Ri k’ax kib’anom pa taq tinamit
Pa uterenb’exik ri elaq’ tajin kab’an pa taq ri ch’ich’, eri rajchak reqa’lenel ri Departamento rech Investigación rech Delitos Patrimoniales rech ri PNC, pa tob’anem kuk’ ri q’atol Tzij rech ri MP, xkib’an jun nim tzukunem pa jun nimaja k’o pa San José Pinula, Guatemala, chi la’ k’ut xechapataj wi ri a Franklin Abelito Cano Herrarte xuquje’ Katerina Fabiola Rac Corado, 30 ujunab’.
Eri xechapatajik are taqom kichapik rumal k’o elaq’ kib’anom, rumal ri’ xtaq kichapik rumal ri Q’atb’al Tzij rech rulewal tinamit rech Santa Rosa, pa 22 rech febrero rech pa junab’ ri’. Pa le tzukunem kumal ri ajchajil tinamit xkiriq keb’ ch’aweb’al, keb’ ch’ich’ rech b’anob’al tzijonem, ruk’ pwaq b’otolik.