Eri ministro rech Gobernación, a Marco Antonio Villeda, rachi’l ri viceministro rech Seguridad, Roberto Solórzano, xuquje’ kuk’ rajtaqanel ri Wokajil Ajchajil Tinamit (PNC), xuya utzijol pa jun nim tzijolinem chi rij tzukunik tajin chi rij taq k’ax ruk’ k’aqb’al q’aq’ xb’an pa le Campo de Marte, zona 5 rech ri nimatinamit, ri xekam wiri’ ri a ub’i’ a Juan Francisco Solórzano Foppa xuquje’ ruk’ ri jun chik ub’i’ a Gustavo Adolfo Aguilar Gamarro.
Eri nim taqawokajnel ri’ xuya ub’ixik che k’o kajib’ puqil rajtzukunelab’ ri PNC ketajin che uq’alajisaxik uwach taq ri jun k’ax ruk’ k’aqb’al ri’, rech qas keriqitaj konojel ri xeb’anow ri k’ax ri’. Xub’ij chik, che tajin uq’alajisaxik ri’, maja’ na kak’is uq’alajisaxik ri’, rumal ri’ are rajawaxik kab’an na le rilik taq ri tzijol chi rij ri’ xuquje’ rumal ri’ tajin jun utzukuxik uwach ri’.
Rumal k’u ri’ e k’o ri xechap chi rij wari’, e’are k’ut ri e’alaxik a Rigoberto Choc Toz, 30 ujunab’, ruk’ ri a Daniel Zaqueo Choc Toz, 18 ujunab’, eri keb’ ri’ e’aj Alta Verapaz. Pa le tzukunem ri’, eri q’atb’al tzij xkiriq k’ut jun k’aqb’al q’aq’ are jun carabina, jun k’olib’al ub’aq’ ri k’aqb’al ri’ xuquje’ jun chaleco rech puqtzukunem, are wa’ jastaq tajin uq’alajisaxik jawije’ upetib’alil.
Tajin usolixik taq videos, taq tzijonem ruk’ taaq k’utb’al rech k’aqb’al
Le a Villeda xub’ij che ri tzukunem katajin chi rij ri jun k’ax ri’ rech kaq’alajisax ri xk’ulmatajik, rech kab’an le rilik uch’ob’ik we qas e’are xeb’anowik ri xechapik xuquje’ rech kilitajik ketzukux nik’aj chik ri xeb’anow ri k’ax jun k’aq ruk’ k’aqb’al ri’.
Eri tzukunik chi rij ri’ are tajin kilitajik ri ub’anik ri k’ax pa taq ri videos, ri ilotajik chi rij ri k’aqb’al, ri tzijol xb’ix kumal taq winaq xuquje’ ri kitzjol taq ri xechapik. Eri jastaq b’antajil ri’ are kub’an uq’alajisaxik ucholajil ri tzijol chi rij xuquje’ rech kach’ob’otajik ri jun k’aq xk’ulmataj ri’.
Chi rij ri ub’antajik ri chajinik rech ri tat a Juan Francisco Solórzano Foppa, eri k’amal b’e rech ri q’atb’al tzij xuq’alajisaj ub’ixik che rumal ri uchak upatan xk’oji wi pa le Ministerio Público pa 2010, e kojom jun molaj chajinelab’ ruk’, ri ya’tal rumal ri División rech Protección rech Personas xuquje’ Seguridad (DPPS) rech ri PNC. Chi rij wari’ xub’ij chik che ri junab’ir xchomarisax ri uchajixik, xuquje’ jacha ri xq’alajisax ub’ixik rumal ri q’atb’al tzij, man k’ot chik xk’ex taj che ub’anik ri’.
Chi rij ri tat Gustavo Adolfo Aguilar Gamarro, xub’ij che, pa nab’e tzij ri’, kachomaxik che ri are ri’ xa’ jun winaq ri xuk’ul apan ri k’ax pa uk’aslemal ri’ xuquje’ kach’ob’ik che ri jun k’aqanik ri’ man are taj taqom chi rij ri are. Pane’ b’a’, ronojel ri xb’antajik rajawaxik kach’ob’ik jacha kab’an uq’alajisaxik uwach ri’.
Kutz’onoj ri utob’anik ri tinamit winaqil ri’
Ri ministro ri’ xub’an jun sik’inik chi ke ri winaqil rech jachin k’o jun utz utzijol chi rij rech uq’alajisaxik chakiq’axej loq ub’ixik chi ke ri q’atb’al tzij rech kaq’alajisax ri jun k’ax ri’. Sib’alaj xub’ij che k’o nim upatan ri katob’anik ri winaq xkil ri jun b’anow k’ax ri’, xuquje’ kuk’ taq ri jalajoj kiwach wokaj winaq ri’ ri k’o nim upatan rech kaq’alajisax ri tzijol ri’, rech kaya uchuq’ab’ ri q’alajisab’al uwach ri jun b’anow k’ax ri’.
Xub’ij k’ut, che ri taqawokajnel ri’ k’o jun jupuq ajno’jchak tzukunel ketajin che rilotajik taq ri video rech tob’al ri chak chi rij. Eri PNC kub’an na le rilik uq’alajisaxik uwach k’a kumol ri tzijol chi rij rech kuq’alajisaj ri jun k’ax ri’ xuquje’ rech kuq’at ri kimak ri xeb’anowiki.