Eri q’atb’altzij rech ri Wokajil Ajchajinelab’ e Ajq’atel Pandillas ri’ (DIPANDA) rech ri Wokajil Ajchajil Tinamit, xkiya’ loq utzijol che ketajin che katzukuxik ri molaj elaq’omab’ che ri kakib’an elaq’ chi ke ri winaqil e aj iximulew ruk’ taq b’anoj jo’snem tzij ri’ aretaq kakib’ij chi ke pa uwachwuj pa k’amq’aq’nil rech kakib’ij chi ke che k’o xkich’ako man tzij taj.
Rumal ri’ kakiya’ loq ub’ixik che rajwaxik kakilo jas ub’anik ri jo’snik kakib’an nik’aj elaq’omab’ ri’, are wa’ kakib’ij panoq:
1. Che xkich’ako jun nim pwaq.
2. Che xkich’ako jun ch’ich’ pick up TOYOTA HI LUX.
3. Che ri kachalal keriqitaj pa EEUU xkitaq loq jun oqxa’n chi ke xuquje’ are la’ rajwaxik k’o pwaq katoj chi rij ri’.
4. Che k’o ri kachalal xepe pa EEUU, ri xechap k’ut pa k’ulb’a’t juyub’ rech México rumal ri’ rajwaxik kataq b’i jun pwaq rech kaya’ kib’e rech keq’ax loq.
5. Che ri kachalal keriqitaj pa nimatinamit naj k’o jun koqxa’n xkitaq loq chi ke (nim pwaq ri’, jastaq ri’, ruk’ nik’aj chik ub’ixik kumal loq, che xaq k’a te’et xriqitaj awan kunb’alil kuk’ pa le aeropuerto) xuquje’ rajwaxik kakitaq b’i chi ke ri pwaq rech kaya’ ketzoqopax loq kaya’ kib’e rech keq’ax loq.
6. E k’o e k’i chi winaqil xejo’stajik kumal nik’aj elaq’omab’ ri’, che ri sib’alaj tajin kitaqom b’i b’iw ub’ixik ri’ pa taq kich’a’wib’al, jeri’ kakib’an pa uwachwuj rech Facebook rech kakijo’saj ri winaq ri’ che ri k’o kachalal pa nimatinamit naj, e nik’aj b’anol k’ax ri’ are kakikoj rajilab’al ch’a’wib’al rech nik’aj chik tinamit pa uwachulew k’a pa Iximulew xuquje’ México rech kakijo’saj winaq keqaj pa kiq’ab’ pa taq le uwachwuj k’amq’aq’nil ri’.
Xuquje’ k’o jun chik b’anoj jo’snik kakib’an nik’aj elaq’omab’ ri’, are kakib’ij panoq chi ke ri winaq che k’o jun xkich’ako xuquje’ k’o che kakib’ij panoq che k’o ri kachalal xchap ri’ rumal ri’ kaq’ax ta pa le k’ulb’a’t juyub’ amaq’ k’o che kakib’ij che xchap pa aeropuerto ri’, rumal ri’ rajwaxik kataq b’i pwaq pa pwaqb’al ja pa kib’i’ rech ketzoqopax ri’.
Rumal ri’ eri q’atb’altzij rech ajchajil tinamit kakib’ij chi ke ri winaqil e aj iximulew rech chakila kib’ rech man keqaj ta pa kiq’ab’ nik’aj elaq’omab’ ri’, chakib’ij panoq pa le 1574 xuquje’ man k’ot pwaq kakitaq b’i pa taq pwaqb’al ja ri’.
Eri q’atb’altzij sib’alaj kakib’ij chi ke ri winaq che qas chakitaq utzijol kuk’ ri kachalal we tzij ri’ k’o oqxa’n xkitaq loq, we man ta ri’ rajwaxik b’a’ chakiya’ b’a’ ub’ixik loq chi ke ri q’atb’altzij ri’.