Eri Wokajil E ajchajil K’ache’laj pa we Amaq’ (DIPRONA) rech ri Wokajil Ajchajil Tinamit (PNC), ri taqom rumal ri Ministro Gendri Reyes Mazariegos ri’, xb’antaj kowonem k’ut che pa le nab’e q’ij rech ik’ enero k’a pa le 31 rech diciembre kanoq k’o k’iyalaj taq che’ qupim maj pa usaqil xriqitaj ri’, jeri’ utzijol xuya’ ri Taqanelab’ rech ri Wokajil Ajchajinelab’ ri’, Comisario Edgar de la Cruz Hernández ri’.
Eri rajilal ri xeriqitaj loq pa ronojel k’o 208 chi tz’ikin, 141 chi awajil kewa’katik xuquje’ 108 chi kumatzil, pa ronojel ri’ k’o 457 chi awajil xeriqitaj ri’, are rajilab’al ri’ man junam ta ri’ ruk’ ri rech pa le junab’ 2020 are chi’ eri e’ajno’j tzukunelab’ rech ri Wokajil Ajchajinelab’ ri’ xkiriq k’ut 125 chi tz’ikin, 97 chi awajil kewa’katik xuquje’ 101 chi kumatzil ri’.
Eri De la Cruz Hernández xub’ij eri che’ e qupim ri maj pa usaqil ri xriqitaj kuk’ ri e ajb’anol k’ax chech ri’ are la’ esam loq pa taq ri k’ache’laj rech pa we amaq’, e k’o k’i chi kech ri e esam loq pa awalil pa taq ri che’ chajim ri’, k’o 1,788.58 chi etok’al chi che’ rech chak xriq ri’, xuquje’ k’o Chicozapote ri’, k’o Ciprés ri’, k’o Caoba ri’, k’o Cedro ri’, k’o Matilisguate ri’, k’o Palo Blanco ri’, k’o ri Conacaste, k’o ri Abedul xuquje’ k’o kab’lajuj chi etok’al rech je’l che’ qupim ub’i’ Rosul ri’.
Eri Taqanel rech DIPRONA ri’ xub’ij che xb’antaj kowonem xriqitajik 246 chi pajb’alil chi ti’ij rech awajil rech k’ache’laj ri’, 4,166 chi saqmo’l rech kok palow xuquje’ ub’i’ Parlama xriqitaj k’ut, jeri’ k’o nima’q taq eqa’nib’al rech cho’m, pa taq le puqchajinem xb’antaj wi kowonem xechapik e oxib’ chi e ajchapol karil e aj hondureño ri’, ri xaq k’a te’et xeriqitaj pa we taq ri nimaja’ rech pa rulewal Iximulew ruk’ ri karil kichapom chik.
Pa k’isb’al ri’, eri De la Cruz Hernández xub’ij che pa taq ri puqchajinem b’anom rumal ri Wokajil Ajchajil Awajil K’ache’laj aj iximulew ri’ xuquje’ pa taq nik’aj chik ya’olchajinem tzukunik xekowon k’ut xechapataj loq e 844 chi winaqilal chi kech ri’ e waqib’ chi ak’alab’ ri’, xuquje’ k’o 341 chi ch’ich’ xeriqitaj ri’ ri e are la’ e kojom pa le ub’ilixik ri che’ e qupim, e b’alajisam, b’anom tz’alam chi rech taq, ri b’anom aq’a’l chi rech xuquje’ k’o si’ b’anom chi rech loq.