Ruk’ xq’atataj tzij ub’ixik chi rij ri pwaqil rech tojb’al chak rech ri 2023, eri ministro rech Gobernación, David Napoleón Barrientos, xuya’ utzujik che pa jun chik junab’ petinaq kutaq ukojik ri’ wuqub’ rachoch rech tijob’al kiwa ri ajchajil tinamit, rech kuya jun utzilem chi ke reqa’lenel ri Wokajil Ajchajil Tinamit (PNC), rumal ri’ tajin reyexik jaw chi’ kakoj wiri’.
Eri cholchak ri’ are utaqim katzuqik ri e ajchajil tinamit, are wa’ uwach ri uloq’axik uwach kichak patan e ajchajil tinamit ri’, are wa’ jun chi ke uwach ri Reforma Policial ri tajin utoq’ixik ub’anik kumal ri q’atb’al tzij rech ri taqawokajnem rech ya’olchajinem pa Amaq’.
K’a te kanoq, xjaqataj uwach ri rachoch tijob’al kiwa ajchajil tinamit pa le comisaría 16, pa zona rech Mixco, chi la’ k’ut ketzuq wi e 1400 chi eqa’lenelab’ e taqom pa chajime pa le sede policial ri’.
Jeri’ pa le jo’lajuj q’ij rech ri ik’ julio kanoq xkoj pa le comisaría 11 ri rachoch tijob’al kiwa e e 1000 ajchajinelab’ jeri’ pa nik’aj chik rachoch k’olib’al ya’olchajinem ri’.
Eri Barrientos, xkub’isaj utzujik che ri b’anoj chak ri’ are la’ tajin ub’anik ri’ rech pa le ya’el utzilem chi ke konojel ri wokajil ajchajil tinamit.