Eri q’atb’altzijr ech ri Departamento rech Tránsito rech ri Wokajil Ajchajil Tinamit (PNC), xkiya’ loq utzijol che katajin tzukunem ya’olchajinik pa taq nimab’e rech pa we amaq’, are wa’ rech taqim kaq’atexik ri ch’ich’ xuquje’ kejch’ich’ rech majun chi ke kuriq tane’ k’ax pa taq nimab’e ri’.
Are wa’ katajin ub’anik pa le Calzada San Juan xuquje’ pa le Aguilar Batres, chi’ k’u ri’ rech kato’ kuwach ri kejch’ich’ ruk’ ujachik ri tob’al kijolom ri e ajb’inisal kejch’ich’ xuquje’ rech kakeqaj kiwujil pa saq ri’.
Eri Edwin López, taqanel rech ri Departamento rech Tránsito, xuya’ utzijol eri tzukunik ya’olchajinem ri’ are rech q’atenik raqoj k’ax, “eri b’anoj tzukunik ri’ rech keto’ik ri winaqil rech rajawaxik kakeqaj kijastaq rech aretaq keb’e chi rij taq ri ch’ich ri’ rech are rajawaxik kakikoj tob’al kijolom rech kekam taj wexa’ k’o k’ax kakiriq tane’ chi rij taq kejch’ich’ ri’. Rumal ri’ xkoj uqapawsib’al chi rij xuquje’ xepixb’axik ri e ajb’inisal kejch’ich’ ri’.
Eri pixb’anik xb’an chi ke pa le ya’ltzijol ri’: Man k’ot tzijoj tzam kumal, man k’ot jun kich’a’w panoq pa ch’awib’alil, man k’ot jun k’o kutij ri’ aretaq kub’inisaj ri kejch’ich’, chakikojo b’a’ kipas rech xe’kipam ri’, xuquje’ chakikojo tob’al kijolom ri’, are wa’ uwach taqanik xb’an rumal ri Sección rech Educación Vial ri’.
Eri López xub’ij k’ut eri nimab’e che ri qas k’ax kab’inisax uwach kumal e ajkejch’ich’ ri’ are ri’: le nimab’e CA-9 Sur kamajtaj b’i pa Ixim Nimatinamit kopan pa Puerto Quetzal pa Escuintla ri’, le nimab’e CA-9 Norte ri kamajtaj loq pa Ixim Nimatinamit kopan pa Puerto Barrios Izabal, le nimab’e CA-2 kamajtaj b’i Escuintla kopan pa Tecun Uman, le nimab’e CA-1 Oriente kamajtaj b’i pa Ixim Nimatinamit xopan pa Jutiapa ri’.