E k’o job’ chi achijab’ keqam k’aqb’al xechap loq pa jun k’aqanik xkib’an kuk’ ri reqa’lenelab’ ri Wokajil Ajchajin Tinamit (PNC) pa le sector La Corrugadora, barrio La Democracia, pa Morales, Izabal ri’. Are chi’ xechapik, xriqitaj k’ilaj taq k’aqb’al q’aq’ kuk’.
Eri utzijol xkiya ub’ixik le ajchajin tinamit, eri reqa’lenel ri Comisaría 61 xya’taj ub’ixik chi ke che e k’o nik’aj achijab’ keqam k’aqb’al q’aq’ e b’enaq pa taq b’insal ch’ich’ xuquje’ chi rij ri kejach’ich’ chi la’ k’ut. Are chi’ xb’an kasolixik, eri nik’aj winaq ri’ e b’enaq pa nik’aj ch’ich’ ri’ ri xkik’aq ri e’ajchajin tinamit, rumal ri’ xkimaj kik’aqik chi kiwach ri’.
Eri nik’aj xechapij e’are k’ut a Alex “N”, 39 ujunab’; a Ismael “N”, 35 ujunab’; a Álvaro “N”, 38 ujunab’; a Winston “N”, 37 ujunab’; xuquje’ a Sergio “N”, 54 ujunab’. Kuk’ nik’aj winaq ri’ xechapik xriq oxib’ raqarik k’aqb’alq’aq’ rech .223, waqib’ chi k’aqb’al q’aq’, 307 chi ub’aq’ raqarik k’aqb’al q’aq’, 57 ub’aq’ rech kupkik k’aqb’al, 12 chi k’olib’al rech ub’aq’ raqarik k’aqb’al, lajuj chi k’olib’alil rech ub’aq’ kupkik k’aqb’al q’aq’ xuquje’ kajib’ chalecos rech tob’al ij.
Are chi’ xechap loq, eri PNC xub’an jun nim puqtzukunem chi la’ xuquje’ xkikorlij rij jun nimaja che ri qaraj chi la’ xkiwajo wi kib’ nik’aj chik winaq keqam k’aqb’al ri rech ri jun molajib’ ri’.
Pa le k’aqanik, e k’o keb’ reqa’lenel ri PNC xesakik ri xek’am b’i pa jun ja rech xekunaxik, chi k’ut tajin wi kakunaxik xuquje’ rech ke’utzirik.
Eri wokajil ajchajin tinamit sib’alaj pa aninaqil xkib’an le kilik xuquje’ xkib’an jun nim puqtzukunem rech xkiq’atij kiwach nik’aj b’anol k’ax ri’. Sib’alaj tajin ub’anik ri tzukunem chi kij ri’.