Rumal kataqixik ri rumumin ch’ich’ pa taq ri nimab’e pa awalik, rech kakiriq ta k’ax pa nimab’e, eri reqa’lenel ri Departamento rech Tránsito rech ri Wokajil Ajchajin Tinamit (PNC), sib’alaj xmajtaj ri puqchajinem pa taq nimab’e ri’ chanim xuquje’ chaq’ab’ ri’, rech keq’atexik jachin kakimol kib’ che ub’anik ri k’ax ri’ pa tinamit.
Are chi’ xmataj uloq ri k’ak’ junab’ eri wokaj chajin tinamit xkib’an ri kilik e 105 chi winaqilal xuquje’ e 105 chi ch’ich’ xuquje’ ri nima’q kejach’ich’, che ri q’alaj man e utz ta chik keb’inisax pa taq ri nimab’e rech qatinamit.
Xuquje’ e k’o 65 chi b’inisal ch’ich’ xkoj tojb’al chi kij. Eri tojob’al ri’ xkojik rumal we man keqam ta ri placas rech keb’inisaxik, we maj kiwujil kakib’inisaj ri ch’ich’, we man uwujil ri ch’ich’ keqam rech keb’inisax, jeri’ we ok’owinaq uq’ij kesam ri kiwujilal xuquje’ we xaq kecharar chik keb’inisaxik, we jarinaq ri kel wi kisib’al, ri koq’ab’alil.
Eri Ministro rech Gobernación, Francisco Jiménez, xuya utzijol che ri puqchajinem are xmajtaj pa k’isb’al wuqq’ij kanoq. Rumal ri’ xeq’alajinik ri kakib’an ri k’ax ri’ xuquje’ xepijixik, rumal ri’ xkoj tojob’al chi kij ri k’o Q200 xusquje’ k’o rech Q500 rumal taq jalajoj ri kimak.
Ri tojob’al kakojik
Sib’alaj rajwaxik keta’maxik ri Taqanem rech Tránsito ruk’ Reta’nib’al B’anoj unimaxik ri Artículo 185, literal b, kutaq ukojik tojob’al rech Q4 mil jachin kuq’atij nimab’e, jachin kukoj jastaq rech q’ateb’al pa tinamit rech b’anoj taq rumumin ch’ich’ pa taq nimab’e, ruk’ nik’aj chik q’atenem kab’an ri’.
Xuquje’ pa le literal c rech ri artóculo kub’ij wi, che kakoj tojob’al rech Q25 mil chi pwaqil chi re jun ajb’inisal ch’ich’ pa tinamit we kukoj ri nimab’e rech kub’an rumumem ch’ich’, we kub’an nik’al junumisab’al tijowchuq’ab’, we man kuta taj ub’ixik pa q’atb’al tzij.