Pa taq ri tzukunem xb’antaj pa we q’ij 27 rech septiembre rumal reqa’lenelab’ ri División rech Información Policial (DIP), rech ri Wokajil Ajchajil Tinamit (PNC) xuquje’ rumal ri Ministerio Público (MP) ri’, xekowon che kaq’atexik jun molaj winaq e ajb’anol k’ax che ri kakeleq’aj kachoch kijuyub’ winaq pa nimatinamit Iximulew xuquje’ pa tinamit Jutiapa ri’, ri nik’aj kakib’an elaq’ ruk’ taq jo’sanik pa q’atb’al tzij rumal kakikoj kib’ che e are ajchoq’e ri’.
Rumal ri’, sib’alaj xechapatajik nik’aj b’anol k’ax kib’i’, Carlos Arístides Benavides Corado, 62 ujunab’, a Tereso Crúz y Crúz, 53 ujunab’, al Mildre Magaly Morales Ambrosio, 42 ujunab’, al Vivian Adaly Aguilar Gómez, 39 ujunab’, a Eddy Enrique Siu Puac, 56 ujunab’ xuquje’ a Santos Evelio Martínez Dávila, 36 ujunab’, e are kab’ixik xkib’an jun nimak’ax elaq’, b’anoj k’ax xuquje’ xkeleq’aj utzijol upam taq wujilal rech taq nimaja juyub’al k’o ajchoq’e.
Pa taq le kachoch winaq xtzukux upam ri’ chi la’ k’ut xriqitaj wi loq keb’ chi k’aqb’alil, oxib’ nima’q ch’aweb’al, 71 ub’aq’ k’aqb’alil rech utz kakojik, wuqub’ yab’al uq’aq’nil, jun q’aseb’al puqch’b’al, jun b’anoj k’ulanem xuquje’ k’i wujilal jalajoj uwach ri’. Eri jastaq k’utb’al ri’ are la’ xk’am b’i kumal ri q’atb’al tzij rech sib’alaj xkitzukuj uwach utzijol ri’ rech yab’al uchuq’ab’ ri tzukno’jchak tajin chi rij taq b’anoj k’ax ri’.
Utzijol b’anoj k’ax ri’
Eri tzukunem b’anom ri’ are xuq’alajisaj ri’, pa le 13 rech agosto rech 2021ri’ eri nik’aj b’anol k’ax ri’ e chapom ri’ e are xe’opan pa le jun wokom ja, rech xkaj xkik’am uwach jun apartamento ri’, xkib’ij k’ut che e are ri e k’ak’ e ajchoq’e ri’. Aretaq xb’an le rilik pa taq le uwachwuj q’aq’nil ri’ xq’alajinik che nik’aj b’anol k’ax ri’ kitz’ib’am chik ri nimaja ri’ pa le Registro General rech ri Propiedad, ruk’ taq wujilal xaq b’anom kumal. Rumal ri’ sib’alaj xechapatajik.