Eri ministro rech Gobernación (Mingob) David Napoleón Barrientos ri’ rachb’ilam ri Fiscal General xuquje’ ajtaqanel rech ri Ministerio Público ri’ (MP) María Consuelo Porras xuquje’ ri k’amal b’e taqanel rech ri Wokajil Ajchajil Tinamit (PNC) Héctor Hernández Mendoza, xkib’ij loq ub’ixik che e k’o keb’ e ajchajinelab’ xkik’owisaj tzij b’anoj k’ax are chi’ e k’o pa chajinem pa tinamit, ma pa usaqil xkichap b’i jun achi kuk’ xuquje’ rech xkitoq’ij pwaq ri xkeleq’aj ruk’ ri xkitaq che reaxik pa jun k’olib’al upwaq pa pwaqb’al ja pa jun cajero automático ri’.
Xuquje’ chi rij ri b’anoj k’ax ri’ k’o lajuj tajin utoq’ixik katzukuxik ri’ rumal e k’o rajchajinelab’ ri PNC, ri jachom chik pa uq’ab’ ri MP xuquje’ k’o winaq sib’alaj kib’im loq chi rij taq toq’inik pwaq b’anom chi ke xuquje’ ri ruk’ itzelal e k’amom b’i kumal e ajchajjil tinamit rech e toqim che resaxik kipwaq pa k’olib’al kipwaq pa pwaqb’al ja ri’ rumal ri’ are la’ sib’alaj tajin utzukuxik uwach ri, xcha’ ri ministro.
“Ruk’ wa’ ri katajin utzijoxik we q’ij kamik, are rumal b’a’ ri k’ax xk’ulmatajik, tajin utoq’ixik pwaq chi ke ri winaqil e aj iximulew xuquje’ eri b’anoj k’ax ri’ man utz ta ri’ kub’ano xuquje’ rajwaxik kub’an utz jikom uwach ri wokajilal ri’, rech kuk’am uchuq’ab’ pa saqilem xuquje’ rech kak’oji qas naqaj na chi ke ri winaq tinamit, pa le uwi b’anoj tijonik chi ke ri e ajchajil tinamit rech utz b’a’ ri ya’olchajinem tzukunik kakib’an ri’, rech qas katzukuxik kuwach ri keriqitaj pa chak ya’olchajinem ri’ rech k’o q’alajisab’al chi kij ri’”, xcha’.
Xub’ij chik eri tzukno’kchak ri’ are sib’alaj katerenb’ex ub’anik rech kilik chinaq ri ketajin che b’anoj k’ax ri’ rech keq’atexik.
Eri k’amanem ub’ixik kumal ri winaq are k’o nim upatanib’al pa tinamit xuquje’ rumal ri’ sib’alaj kaqab’ij chi ke ri winaqil rech qas chakib’ij loq, are rech kub’an utz pa saqilem ri ya’olchajinem pa le taqawokajilal ri’, rech utz e suk’ kakib’an che kib’ ri e ajchajil tinamit, xcha’ ri ministro.
Eri Barrientos Girón xub’ij che ri nik’aj e ajchajinel che ri xechapik e are ri’ a Julio Eliseo García Pascual xuquje’ a Miguel Ángel Camo Capriel ri’. Xuquje’ xuya’ ub’ixik chi k’o jun chi ke xranij rib’ are ub’i’ Ángel Ramiro Pérez Chávez ri’.
Eri k’ax xkib’an ri’
Eri nimpatanel xub’ij, eri b’anoj k’ax ri’ are xk’ulmatajik pa le 17 rech diciembre rech ri 2021 ri’, pa taq nimaq’ab’, are chi’ eri e oxib’ e ajchajil tinamit maj pa usaqil xkichap b’i xkik’am b’i kuk’ pa jun patrulla xuquje’ sib’alaj xkich’ayo jun loq’ winaq achi are chi’ xkiq’ajisaj pa le uch’ich’ b’enaq wi rech xkik’am b’i pa jun k’ayib’al jastaq rech pa jun gasolinera ri’. Chi la’ k’ut, xkik’am wi b’i rech xkitoq’ij pwaq korte’l chi re rech xresaj pa jun cajero automático k’o pa le zona 15 rech pa nimatinamit, rumal ri’ eri nik’aj winaq e ajchajinel eri kimak kab’ixik are eleq’an winaq b’i kuk’ xuquje’ b’anoj k’ax elaq’ ri’.