Pa taq’aj juyub’ rech ri amaq’ tinamit xjaq wi le jun k’ak’ jachakub’al Oficina rech Investigación rech Casos rech Ciberdelitos pa le Delegación rech ri División Especializada rech Investigación Criminal (DEIC) ri’ uq’ab’il ri Wokajil Ajchajin Tinamit (PNC), k’o pa le tinamit rech Escuintla ri’. Eri rachoch uk’olib’al ri q’ateb’al k’ax, ri utzilaj ilonem ruk’ ri q’ateb’al taq b’anow k’ax pa keme’uwachwuj pa kaqiq’.
Eri ukojik taq rachoch chajib’al are kajipix pa taq tinamit rech Santa Rosa xuquje’ Suchitepéquez ri’. Le rachoch jachakub’al ri’ are k’o pa ukab’ cholajisab’al pa amaq’ tinamit, eri nab’e xmaj ujaqik uwach are le xjaq pa le rachoch rech ri DEIC rech Chiquimula, pa abril kanoq. Sib’alaj k’o utoq’ab’ utob’anik le Naciones Unidas pa le cholchak ub’i’ “Ciberciudadanos: Ab’om Alitom e Yakol Joremal ri’”.
Le nim nan al Karen Ortiz, viceministra rech Tecnología rech Ub’ixik Utzijoxik, sib’alaj xub’ij chi k’o nim upatanib’al ri’ uya’ik uchuq’ab’ril ri b’anow taq tzukno’jchak pa keme’uwachwuj utzijob’al pa kaqiq’ chi rij taq kich’akul ri kaminaqib’. “Eri ya’olchajinem ri’ rech ta kab’an xa’ pa jun ulewal k’olib’al, eri b’anow k’ax ri’ xuquje’ are kab’an pa keme’uwachwuj tzij pa kaqiq’, ruk’ ri kojob’al ri chokonsa’n rech k’ak’ keme’uwachwuj ri’”, xcha’.
Pa nojimal kojtajin che uchakuxik ri jun ub’anikil ri k’ak’ ya’olchajinem, ri k’olik kak’oji chinaqaj ri winaqil rech kemchomaxik pawe q’ij kamik, eri ub’anikil taq ri k’ak’ keme’uwachwuj tzij pa kaqiq’ k’o nik’aj chik uchuq’ab’ilal ri’ are la’ rajawaxik kaqab’an uq’atexik uwach, jacha ri kakib’an ri wokaj ajchajin tinamit pa Iximulew, ri k’o pa qeqale’nib’al rech kapatanij jacha kub’ij le taqonib’al tzij pa amaq’ tinamit”, xcha’ le nan viceministra al Ortiz.
Eri taqanel rech ri DEIC, A Nelson Pichiya, xub’ij che ri ja k’olib’al chajinem ri’ man xaq ta ri’ rech kuya nim uchuq’ab’ ri taqwokajilal pa le uq’atexik ri ub’anikil taq ri k’ax pa keme’uwachwuj tzij pa kaqiq’, xane’ are rech kab’an ri kapatanexik ri winaqil pa rulewal amaq’ tinamit. “Eri DEIC kutun uchuq’ab’ ronojel pa kemonchak pa taqawokajil che ri kakib’an utz taq chakunik pa tzukno’jchak ri’”.
Le al Karen Vargas, are rajtaqanel ri Naciones Unidas pa Iximulew ri’, xub’ij che ri jachakub’al ri’ are rech kachomaxik le jun ya’ik nim uchuq’ab’ ri kemonchak pa taqawokajilal ri’ rech kaq’alajisax uwach ri k’ax b’anom ruk’ uchak utob’anik le k’ak’ wokaj rech keme’uwachwuj tzij b’ixik pa kaqiq’. “Are rech kanajtib’ taj uq’atexik uchomaxik ri’, rech kab’an ri jun utzilaj ukolik ri jastaq q’alajisab’al rech keme’uwachwuj tzij pa kaqiq’ xuquje’ rech katob’anik che uq’atexik ri q’ub’am ub’anikil taq k’ax pa taqawokajilal”.
Eri ub’anikil taq q’ateb’alil ri’ are la’ uwach ri cholchak taqom ub’anik rumal le Q’atb’al tzij K’amal B’e Amaq’ rech Iximulew ri’ rech pa uterne’xik ub’anik ri k’ak’ taqanem rech k’ak’ keme’uwachwuj tzij pa kaqiq’, rech kab’an ukolik ri tzijol tzij, ri kachajixik ri winaqilal xuque’ rech kab’an ya’ik uchuq’ab’ ri kemonchak chomanem kumal ri taqawokajil chi uwach taq ri uxib’ib’anik tzij pa taq k’ak’ keme’uwachwuj tzj pa kaqiq’.