Xb’antaj unimaxik ri ub’e’al b’anoj chajinem pa le upatanexik ri Plan rech Seguridad 30-2022, eri Subdirección General rech Análisis rech Información Antinarcótica (SGAIA) ri’, rech ri Wokajil Ajchajil Tinamit ub’i’ (PNC) komonchak ruk’ ri Ministerio Público ri’ ub’i’ (MP), paq’ij 25 rech octubre ri’ xkib’an waqib’ uwach b’anoj tzukunem, solinik pa kachoch winaq xuquje’ rech xkik’am b’i ri jastaq kuq’alajisaj uwach ri k’ax b’anoj pa taq k’olib’alil pa uk’u’x nimatinamit ri’.
Eri Ministro rech Gobernación, David Napoleón Barrientos ri’, xkiya ub’ixik eri e ajchajinel e ajq’atenel awan kunb’alil xuquje’ ri q’atol tzij chi k’aqanik xek’ul chi la’ kumal nik’aj b’anol k’ax e k’o pa jun ja k’olib’al pa le 6ª. calle xuquje’ 10ª. avenida, zona 11 rech pa uk’u’x nimatinamit ri’; pa le k’aqanik ri’ xsakataj wi ri ajchajinel ub’i’ a José Mario Álvarez Monzón ri’, ri pa aninaqil xk’am b’i pa rachoch rech kekuna wi yawab’ ri’ ub’i’ Hospital Roosevelt ri’.
Eri e ajkun xkib’ij, eri a José Álvarez xsakataj che k’aqb’al che raqan rech uwikaq’ab’ ri’, rumal ri’ xsaq’ar uk’ike’l chi rij ri’, are la’ pa aninaqil xkunax ri’. Rumal ri’ eri taqawokajnel rech ri Ya’olchajinem pa Amaq’ xub’ij che ri jun ajchajinel ri’ sib’alaj kato’ik rilik rumal ri wokajilal xuquje’ kumal ri taqanel kech ajchajil tinamit sib’alaj kakito’o rech ka’utzurik pa aninaqil.
Rumal k’u ri’ eri tzukunelab’ rech ajchajil tinamit xkiriq pa le jun ja k’olib’al winaq che ri xek’aq wi chi la’ k’ut xkiriq wi k’i taq peraj k’olib’al awan kunb’alil, chom pwaq, k’i ch’aweb’alil, jun k’aqb’al, k’i k’olib’al ub’aq’ k’aqb’alil ruk’ ub’aq’ k’aqb’al ri utz kakojik, ruk’ jun upisob’al k’aqb’al xuquje’ ruk’ chi ch’ich’.
Eri q’atb’al tzij xkib’ij ch eri wokajil ajchajil tinamit ketajin chi la’ che katzukuxik nik’aj b’anol k’ax che ri xek’aqan chi la’ k’ut, are wa’ k’o na utzijol kaya ri’.