Are xtaqixik ub’anik jun utzalaj chajinem chi kech ri winaqil e wa’katelab’ pa le Nimalaj Awas Q’ij pa tinamit rech are xeki’kotik xeb’e pa uk’olib’alil taq uxlanb’al xuquje’ rech e are jun xek’oji pa taq ri telentyox che ri xb’an pa Iximulew, chi’ k’u ri’ xe’opan wi ri wokajil ajchajin tinamit pa taq ri k’olib’alil chajinem kojom rumal ri Sistema Nacional rech Prevención pa Awas Q’ij ri’ (SINAPRESE) pa taq ri jalajoj k’olib’em pa tinamit ri’.
Eri Ministro rech Gobernación, Francisco Jiménez, xopanik xusolij we utz ri chak chajinem tajin kumal ri reqa’lenelab’ ri Wokajil Ajchajin Tinamit (PNC) xuquje’ kumal ri wokajil chajinik rech xkikub’isaj ri k’olib’em chi kech ri winaqilal pa tinamit xuquje’ chi uchi’ taq palow rech ri Puerto San José, Escuintla. Pa le ropanik chi’, eri nimatat Jiménez xub’ij chi k’o jun nim upatanib’al ri unimab’al tajin che ub’anik ri K’amol Ub’e Amaq’ Bernardo Arévalo, pa le kachajixik ri winaqilal xuquje’ pa le kub’saxik kik’u’x kanima’ ri’.
Eri Secretaria Ejecutiva rech ri Coordinadora rech ri Reducción rech Desastres (Conred), Claudinne Ogaldes Cruz, xub’ij ri uchak tajin kub’an ri SINAPRESE are utaqim unab’ejsaxik uq’atexik ri riqom k’ask’olil we xaq te’et kak’ulmataj tane’ pa le Nim Awas Q’ij. Xuquje’ xub’ij, che pa taq ri k’olib’al e kojom ri’ pa ronojel e 153 e kojom pa rulewal tinamit, are la’ tajin upatanexik kumal rajchak taq ri taqawokajil rech ke’ilon chi kech ri winaqilal we rajwaxik keto’ik.
Pa taq ri telentyox pa taq le Costa Sur rech pa amaq’il, eri Ministro Jiménez ruk’ ri Secretaria Ogaldes Cruz, xkib’an rilik ri chajinem kumal ri wokaj e ajchajin tinamit pa taq ri k’olib’alil chajinem tzukunik che ri kojom pa qas kak’owib’al ri winaqil pa taq nimab’e, jeri’ pa le Autopista Palín-Escuintla, rech kaq’atexik ri b’anoj k’ax xuquje’ rech k’o jun utz chajinem kab’an chi kech ri winaqilal kewa’katik pa taq we q’ij ri’ chi la’ k’ut.
Pa k’isb’alil, eri Taqawokajnel rech ri Ya’olchajinem pa Amaq’ xopan che jun solinem chi kech ri Delegación Antinarcótica rech ri PNC pa Puerto Quetzal, Escuintla, chi’ k’u ri’ xub’ij chi kech ri wokaj e ajchajil tinamit chi rij ri b’anoj chajinem rech kakikub’isaj ri kik’olib’em ri winaqil rech ki’kotemal kek’oji pa le nimaq’ij rech ri Awas Q’ij ri’. Xuquje’ xusolin che rilik ri chakub’al kariqitaj pa rachoch k’olib’al taq e ajchajin tinamit, rech kaya k’ut kachakub’alil kachokonsab’alil ri’ rech k’o ri chakub’al kakikoj pa le chajinem pa taq ri wokja pa tinamit.