Eri nimataqanel ya’olchajinem pa we Amaq’, David Napoleón Barrientos kuk’ ri viceministros rech Gobernación ri’, ruk’ ri k’amal b’e Wokajil Ajchajil Tinamit (PNC), Héctor Hernández kuk’ rachib’il taqanelab’ ri’, xkiya uq’ij we q’ij kamik pa 15 rech septiembre ri’ ri ajchajil tinamit xkamisaj pa ya’olchajinem ri’, Fernando Morán Portillo, pa le nimrachoch ri Ministerio rech Gobernación (Mingob), zona 1 rech pa nimatinamit ri’.
“Are chi’ we k’o jun ajchajil tinamit kakam pa le uchak patan chajinem ri’, k’o jun nimalaj k’ax ri’ kuya pa qanima’ chaqe qonojel ri kujchakun pa le ya’olchajin tinamit. Rumal qaya’om juntir qak’aslemal pa unimaxik ri qatinamit ri’ are la’ k’o jun nim uq’ijol kub’an jun ajchakunel pa tinamit ri’”, xcha’ ri ministro Barrientos.
Eri taqawokajnel ri’ xub’ij: “Xtaqataj uq’alajisaxik wumal rech qas kaq’alisax b’a’ uwach jun b’anoj k’ax ri’ xuquje’ rech kechap ri nik’aj ri xkib’an k’ax chi re ri ajchajinel Morán Portillo xuquje’ chi re a Juan Ismael Tzep Chávez, ri xintaq ub’ixik chi rech qast b’a’ aninaq ka’utzur b’a’”.
“Rumal ri’ kuwaj kinb’ij chi ke ri rachalal ri ajchajinel xkamik, che are jun b’a’ xkiya kik’aslemal xekamisaxik pa le ya’olchajin tinamit, pa amaq’el ri’ kana’texik uq’ij xk’oji che ajchajil tinamit ri’.
Rumal ri’ sib’alaj kaqab’ij che ri kaqaterne’j unimaxik rech kechajixik ri winaqil e aj iximulew ri’”, xcha’ chik ri k’amal b’e Hérnández.
Pa le yab’al uq’ij ri qatz’ ajchajinel ri’, eri q’atb’al tzij xkijach le Bandera rech Nimatinamit Iximulew chi kech ri rachalal xuquje’ xkipoq’isaj 21 chi ub’aq’ poq’sab’al rech xkina’tij xkiq’ansaj uq’ij ri ajchajinel xkamik, ri k’o chik wajxaqib’ junab’ tajin pa chak patan pa le wokajil ajchajil tinamit.
Eri ukaxon k’amom wi b’i ri ajchajinel kaminaq ri’ Moran Portillo, xtelex b’i chu’ kiteleb’ ri q’atb’al tzij ri’ are chi’ xel b’i pa le nimrachoch ri wokaj chajinem ri’. Rech xk’am b’i pa le aldea El Ashagua, Guastatoya, El Progreso ri’, ch la’ k’ut Kamuq wiri’.
Eri xk’ulmatajik
Eri k’ax ri’ xk’umatajik pa le 14 rech septiembre kanoq, are chi’ eri e ajchajinel ketajin pa chajinem chi la’ pa zona 1 ri’ rech pa nimatinamit Iximulew, xaq k’a te’et k’ut nik’aj b’anol k’ax xkik’aq ri ajchajinelab’, rumal ri’ xkam ri ri Morán Portillo xuquje’ xkisoko le rachib’il, ri xk’am b’i pa ja kunanib’al ri’. sib’alaj k’ax uriqom ri’.