Eri Subdirección General rech Análisis rech Información Antinarcótica (SGAIA) rech ri Wokajil Ajchajil Tinamit (PNC) uchakum chik pa junab’ ri’ choma’q chi tiko’n awan kunab’al pa taq rulewal ri tinamit. Pawe q’ij chanim, pa le chak b’anom riqom chik waqib’ tiko’nib’al awan kunab’al eri rajil ri’ ok’owinaq pa Q24 millones ri’.
Eri wokajil ajchajil tinamit xkib’an k’i puqchajinem tzukunik pa taq tinamit rech Chuwi’meq’ina’, Chinab’jul xuquje’ pa San Marcos ri’, chi la’ k’ut xekowonik xkiporoj 66 mil 264 raqan ichak tiko’n rech marihuana pa jalajoj utiko’nib’alil, eri rajil xpajik kok’ow pa Q24 millones 230 mil 250 ri’.
K’o jun puqchajinem tzukunik xb’an kanoq pa le k’isb’al wuqq’ij pa le caserío San José Sigüilá, Momostenango, rech Chuwi’meq’ina’, chi la’ k’ut xporox wi 27 mil 408 chi raqan ichak tikom rech marihuana, eri rajil kopan pa Q10 millones. Are wa’ xq’alajin ri’ are chi’ xb’an jun utzukuxik kumal ri wokajil e ajq’atenel rech awan kunab’alil pa tinamit.
Kiq’alik ri winaqil
Eri chak b’anonem ri’ man xaq ta ri’ kub’an nim uq’atexik ri narcotráfico pa tinamit, xane’ rech b’a ke’uq’al ri winaqil tinamit chi rij taq ri k’ax kub’an ri’ xuquje’ rumal k’o ri q’atb’al tzij chi rij ri tiko’nib’al awan kunab’alil. K’o ri Taqanem rech Q’atenik Narcoactividad chi kij ri’ k’o 20 junab’ pache’ tojb’al chi rij wari’ xuquje’ k’o jun nim tojonik rech Q100 mil chi pwaqil chi kij ri’ jachin keqaj pa b’anoj taq k’ax ri’.
Eri K’amal B’e Amaq’ Bernardo Arévalo pa reqele’n uchakunem ri Ministerio rech Gobernación (Mingob) sib’alaj xuya’ ub’ixik chi k’o nim upatanib’al ri q’atenik ri narcotráfico ruk’ ri tijow taq awan kunab’al pa tinamit. K’o nim upatanib’al ri tob’anem chi kuwach ri wokaj ajchajil tinamit kuk’ ri winaqilal rech pa le utzilaj kaq’atexik ri molaj b’anol taq k’ax pa tinamit.