Paq’ij 7 rech junio ri’ pa ukab’ q’ij chik tajin ri puqchajinem tzukunik kumal ri wokajil ajchajil tinamit rech kaq’atexik nik’aj b’anol k’a e kamisanelab’ elaq’omab’ ri’ chi’ k’ut xechap wi loq e keb’ uwinaqil ri jun molaj chi elaq’omab’ kib’i’ Los Atracadores rech Occidente ri kab’ixik e are xkeleq’aj ri cajas rurales ri’ pa tinamit rech Xe’laju’, rech San Marcos xuquje’ rech Chuwi’meq’ina’ ri’.
Eri b’anoj tzukunem ri’ are la’ xb’antaj kumal ri reqa’lenel ri Departamento rech Q’atel K’ax chi ke Winaqil rech ri División Especializada rech Investigación Criminal (DEIC) rech ri Wokajil Ajchajil Tinamit (PNC) pa tob’anem chi kech ri Ministerio Público (MP), ri k’o pa nimatinamit rech Xe’laju’ ri’.
Eri xechapatajik e are ri’: a José Alberto Argueta Mendoza (salvadoreño), 36 ujunab’, alias Guanaco, xchapataj pa le zona 2, La Esperanza, Xe’laju’, are kab’ixik xub’an ri elaq’ xuquje’ xub’an b’anoj taq k’ax.
Jeri’ xchapataj ri’ a Moisés Waldemar Macario García, 25 ujunab’, alias Moy xuquje’ a Kevin, kab’ixik xub’an b’anoj k’ax elaq’ ri’.
Ri k’ax xkib’ano
Eri al Sandra Maribel Mendez Gómez de García, 40 ujunab’, xchapatajik rumal xriqitaj jun k’el q’en upalaj k’o ruk’, eri je’l tz’ikin ri’ tajin usachik kiwach; jeri’ xchap al Floridalma García Méndez, 23 ujunab’, ri xriqitaj jun ch’aweb’al ruk’ ri xa’ releq’am ri’ pa le 15 rech mayo kanoq.
Xuquje’ xchapataj ri al Ruth García Martínez De Macario, 45 ujunab’, rumal xeriqitaj keb’ kaimanes xuquje’ oxib’ taq k’el ruk’.
Pa taq kachoch nimaja xtzukux upam, chi la’ k’ut xriqitaj wi loq jun k’aqb’alil, oxib’ chi ch’aweb’al, oxib’ chi taq k’olib’al rech chaqi’j ichaj rech marihuana, jun DVR, 17 ub’aq’ k’aqb’alil ruk’ k’i taq wujilal ri’.
Ri xeq’atexik
Pa 18 rech mayo rech ri junab’ 2022 are chi’ xb’an ri nab’e puqchajinem tzukunik rech kaq’atexik ri e kamisanelab’ xuquje’ elaq’omab’ ri’, chi la’ xek’oji pa b’anoj tzukunem ri’ ri reqa’lenelab’ ri DEIC pa uto’ik ri MP; pa le q’ij ri’ xechapik e 14 chi winaqil ri xtaq kichapik rumal q’atb’al tzij are chi’ xechapataj e kajib’ chi uwinaqil ri jun molaj chi elaq’omab’ kib’i’ Los Atracadores rech Occidente ri’, ri sib’alaj xeq’atexik.
Eri xechapatajik kab’ixik e are xkib’an kamisanik, xkib’an k’ax elaq’, xkib’an ri k’axalaj elaq’ ri’.